O tempo cheira a estación ferroviaria
no arrabaldo do amencer,
cando os trens agallopan xemendo
por túneles de noite
e brilan luces misteriosas
nos bosques profundos
e no perfil confuso das cidades lonxanas.
Mentras [*Mentres] imos andando.
O tempo soa a frauta melancólica
de pastor isolado; a birimbao de vento
nas marelas acacias ao caír a tardiña.
Un soar monocorde
que ven baixando a tombos dos curutos,
chega até o val e trócase en paxaro.
Mentras [*Mentres] imos andando.
O tempo ten a cor dos prados, pero ás veces
ponse gafas vermellas e reloce,
-esmacelado e fondo, aluarado-
coma un Sahara de augas movedizas,
auga de area, chuvia de area,
sobre mares de area interminábeles.
Mentras [*Mentres] imos andando.
O tempo leva grímpolas de berros pendurados
dun aramio de espiño; leva fírgoas de luz;
leva farrapos de esperanzas ergueitas
sobre mastros de soños; e leva as derradeiras
palabras dos soldados descoñecidos
que morreron nas guerras polas patrias inútiles.
Mentras [*Mentres] imos andando.
O tempo é unha cousa que está e que esbara
coma cóbrega longa rastrexando
o corazón dos homes, ises vermes
que están tamén e van tamén pasando,
matinando furar un rexo muro de soidades,
pedra de escuros dioses que couta a súa sombra.
Mentras [*Mentres] imos andando.
Mentras [*Mentres] imos andando o tempo ten un nome,
un alcume de neve que ninguén o pronuncia,
un alcume que esbagoa nos vidros do inverno
e nos segredos xardís de acibos mergullados.
Mentras [*Mentres] imos andando pregunto polos mortos,
pregunto polas cores das froles que amaban,
pregunto polas mornas mañás que gozaron,
pregunto polas ondas do mar. Eu pregunto.
Mentras [*Mentres] imos andando.
* Modificación do poema orixinal
credits
from Malos Tempos,
released January 29, 2016
Música: Javier Prado
Poema orixinal de Celso Emilio Ferreiro, “Mentras imos andando” extraído do libro Longa Noite de Pedra (1962)
The second album by French-Moroccan power quartet Bab L' Bluz is packed with dizzying melodies and rich instrumentation. Bandcamp New & Notable Feb 14, 2024
A concept record about coming-of-age gleefully grifts from all types of rock music, from garage to glam to power pop. Bandcamp New & Notable Oct 13, 2022
Inspired by their travels in New Orleans, Naples, and the UK, the “Italian-hills country blues” duo pen a global love letter to roots music. Bandcamp New & Notable Mar 30, 2022